Dil kee deewaar pe

Unse koyee shikwaa na shikaayat hee karenge
Jo kuchh milaa hai pyaar men chupchaap sahenge

Dil kee deewaar pe zakhmon ko siyaa hai maine
Dard uthtaa hai to usko bhee piyaa hai maine

Gham kee vaadee men ye toofaan jab bhee aate hain
Apnee yaadon ko hee ilzaam diyaa hai maine

Meree DhaDkan men vo rahte hain jaise sadiyon se
Par zubaan se na kabhee naam liyaa hai maine

Berukhee unkee ye kis moD pe le aayee hai
Aansuon ko bhee to chupke se piyaa hai maine

Bezubaan dil ye bhalaa kaise koyee baat kahe
Isko nagmon men hee izhaar kiyaa hai maine

Saans chaltee hai to jeenaa bhee paDegaa mujhko
Meree tanhaayee ko aise hee jiyaa hain maine